Quid est Epithalamium?

Est ea oratio quae habetur ad nuptias cujusdam Regis aut Principis celebrandas.

Quomodo auspicatur?

A Diis genialibus, & à naturae & legum instituto. Mox enumerantur conjugii commoda, privata, publica: sequitur sponsi & sponsae laudatio: tùm concipiuntur vota utriusque nomine, ut mutuo constantique amore junctis, feliciter cedant nuptiae, ut videant liberos, nepotes, & qui nascentur ab illis. Concluditur omine, praesagio ex voto.

Subjice exemplum.

Ita Barclaius in Argenide, lib. V. 2. Metr.

Instat Hymen, laetisque parat connubia votis;

Instat Hymen: sed tu cupidum succendere castas

Nunc prohibes, Gradive, faces. O dure, tuisque

Saevior Odrysiis, sic nostra in gaudia pugnas,

Et sancto genitum ferus internectis amori?

Quid queror invidiam Superûm? Sunt ista faventis

Signa Deae, Paphias fumant cui thura per aras.

Illa coronatis genialem auctura triumphis

Laetitiam, differt avidas paulùm improba flammas,

Extimulatque mora; ceu parvae aspergine lymphae

Grandior exurgit laesusque irascitur ignis.

Nunc age Threïcios molire per ardua currus,

Armipotens, Libycaeque petens discrimina pugnae;

Hunc Regem, ceu tu superos fortissimus inter

Sic hominum primum, magna tege numine dextrae.

Vos quoque (Sicania thalamos dum mater in aula

Apparat, & similes miratur Cypria vultus)

Ite, leves pueri: bellum vocat: ite per auras;

Et vos arma decent, nec frustra tenditis arcum;

Ite, Cupidinei coetus. Sed parcite telis,

Inque feros vester potiùs stet vitricus hostes.

Victores Libyca postquàm remeabitis ora,

Gratior hìc vestras vacuabit pugna pharetras.